Svake verb
Svake verb er verb som får ending i preteritum. Denne endinga er forskjellig for dei ulike typane svake verb: -a, -te eller -de:
Infinitiv |
Presens |
Preteritum |
Perfektum |
å tolke |
tolkar |
tolka |
har tolka |
å hjelpe |
hjelper |
hjelpte |
har hjelpt |
å leve |
lever |
levde |
har levd/levt |
å tru |
trur |
trudde |
har trudd/trutt |
å velje |
vel |
valde |
har valt |
A-verb
A-verb er verb som får -a i endingane i både presens, preteritum og perfektum:
å tolke – tolkar – tolka – har tolka
Dei fleste verba som får -et på bokmål (til dømes å passe – passet) , er a-verb på nynorsk.
E-verb
E-verba får endinga -er i presens og -te eller -de i preteritum:
å hjelpe –hjelper – hjelpte – har hjelpt
å leve – lever – levde – har levd/levt
å tru – trur – trudde – trudd/trutt
å arbeide – arbeider – arbeidde – har arbeidd/arbeidt
Dei fleste av e-verba kan ha endinga -te i preteritum, slik dei har på bokmål. Men nokre må ha -de. Kva for verb har så -te-ending, og kva for verb må ha -de? Dette kan du finne ut ved å sjå på stammen på verbet. Stammen er det som blir att når du tek bort infinitivendinga. Stammen av verbet å hjelpe er hjelp. Hovudregelen er da at alle e-verb der stammen endar på konsonantane -f, -l, -s, -k, -p, -s, -t, og -r, skal ha -te i preteritum. Dei fleste verb der stammen ikkje endar på ein av desse konsonantane, må ha -de. For å hugse på dei konsonantane som krev -te-ending, kan du tenke på at dette er alle konsonantane i ordet flaskepostar.
Når det gjeld e-verb med stamme som endar på -m og -enn, kan du velje om du vil skrive -de eller -te i preteritum. Her kan du gjerne velje den endinga som passar med talemålet ditt:
å døm(m)e – døm(m)er – dømde/dømte – har dømt
å brenne – brenner – brende/brente – har brent
Alle e-verba kan ha endinga -t i perfektum, og dei fleste må ha det. For å gjere det enkelt kan du derfor velje å bruke perfektumendinga -t på alle e-verba: har bygt, har trutt, har arbeidt.
J-verb
Denne gruppa skil seg frå dei andre svake verba ved at j-verba ikkje har ending i presens. Men fordi verba har ending i preteritum, blir dei rekna som svake verb. J-verb med stamme som endar på - d, -g eller -v, kan ha -d som ending i perfektum, men om du vil gjere det enkelt, kan du velje å la alle slutte på -t:
å velje – vel – valde – har valt
å krevje – krev – kravde – har kravd/kravt
Uregelrette svake verb
Nokre svake verb har uregelrett bøying. Ein del av desse verba er svært vanlege, så du bør prøve å lære dei:
Å bøye – bøyer – bøygde – har bøygd/bøygt
Å eige – eig – åtte/eigde – har ått/eigd/eigt
Å gjere – gjer – gjorde – gjort
Å legg(j)e – legg – la – har lagt
Å seie – seier – sa – har sagt
Å setje/sette – set - sette – har sett
Å vite – veit – visste – har visst
Test deg selv
Nettressurser
-
Øvingar i svake verb
(elevrom.sprakradet. no) Øvingar i svake verb på nettstaden til Språkrådet. -
Øvingsrekkje
(elevrom.sprakradet. no) Øvingsrekkje i svake verb på nettstaden til Språkrådet.